Фарғона вилояти ЙҲХБ бошлиғи қариндошининг жарималарини бекор қилгани учун лавозимидан олинди
Ички ишлар вазирлиги ҳодиса тафсилотларини расман тасдиқлади.
Фарғонада ЙҲХБ бошлиғи Акмал Аҳмедов ўз лавозимидан озод этилди. Бу ҳақда Ички ишлар вазирлиги Йўл ҳаракати хавфсизлиги бош бошқармаси (ЙҲХБ) матбуот хизмати маълум қилди. Аввалроқ ижтимоий тармоқларда вилоят ЙҲХБ раҳбари яқин қариндошига тегишли бўлган Малибу русумли автомобилга оид 106 та қоидабузарлик ноқонуний бекор қилингани ҳақида хабарлар тарқалган эди.
Мазкур транспорт воситаси давлат рақами 40 081 СБА бўлиб, унга тегишли жарималар тизимдан олиб ташланган. Текширув натижасида автомобиль ЙҲХБ бошлиғининг қариндошига тегишли фирмага мансублиги аниқланган. Ҳодиса ижтимоий тармоқларда кенг муҳокамаларга сабаб бўлди.
Ички ишлар вазирлиги ушбу ҳолат юзасидан хизмат текширувини ўтказди. Подполковник Акмал Аҳмедов эгаллаб турган лавозимидан озод этилди, иш ҳужжатлари эса ҳуқуқни муҳофаза қилувчи органларга топширилди. Расмийларга кўра, бу коррупцияга қарши қатъий кураш доирасида амалга оширилган чора бўлди.
Шунингдек, ҳайдовчи илгари бекор қилинган барча жарималарни давлат фойдасига тўлиқ тўлагани билдирилди. Тергов ишлари давом этмоқда. Мутасаддилар ушбу каби ҳолатларга нисбатан кескин чоралар кўрилишини таъкидлашмоқда.
