Самарқандда сифатсиз қурилаётган мактаблар бузиб ташланди
Уларда реконструкция ишлари сифатсиз ҳолда амалга оширилаётгани аниқланган.
Самарқанд вилояти Ургут тумани ҳудудидаги қатор ижтимоий соҳа объектларида қурилиш меъёрларига риоя қилинмаслиги, техника хавфсизлиги талабларининг бузилиши каби ҳолатлар аниқланди. Бу ҳақида вилоят ҳудудий Қурилиш ва уй-жой коммунал назорат инспекцияси хабар берди.
Қайд этилишича, туманнинг «Дўстлик» маҳалласидаги 142-сонли мактабни реконструкция қилиш жараёнида хусусий корхона томонидан олиб борилаётган қурилишда бинонинг иккинчи қаватида терилаётган ғиштларнинг вертикал ва горизонталь чоклари қоришма билан тўлиқ тўлдирилмагани, лойиҳа бўйича кўзда тутилган СГ-1 сеткалар умуман қўйилмагани аниқланган. Бундан ташқари, объектга олиб келинган қурилиш материалларини сақлаш учун махсус омборхоналар ташкил қилинмаган. Камчиликлар бўйича демонтаж ишлари амалга оширилган.
Шунингдек, «Терак» маҳалласида жойлашган 73-сонли мактабни реконструкция қилиш ишларини олиб бораётган МЧЖ томонидан ҳам ўхшаш камчиликларга йўл қўйилган. Жумладан, ғиштлар орасидаги чоклар сифатсиз тўлдирилган, СГ-1 сеткалар ўрнатилмаган, шунингдек, қурилиш майдонида юритилиши лозим бўлган ижро ҳужжатлари тўлиқ юритилмаган. Аниқланган қоидабузарликлар юзасидан Инспекция томонидан тегишли кўрсатмалар берилиб, сифатсиз ишлар буздирилган.
«Мўминобод» маҳалласидаги 92-сонли мактабда эса объектга олиб келинган қурилиш материаллари очиқ ҳолда сақланмоқда, махсус омборлархоналар ташкил қилинмаган. Шунингдек, бинонинг баъзи жойларида бажарилган темир-бетон ўзаклар, яъни сердечниклар лойиҳа талаблари асосида бажарилмаган, объект ҳудуди қурилиш чиқиндиларидан тозаланмаган.
“Юқоридаги қоидабузарликларни бартараф этиш бўйича инспекция томонидан масъулларга бажарилиши мажбурий бўлган кўрсатмалар берилиб, уларнинг ижроси қатъий назоратга олинди”, дейилади хабарда.
