Журналист Анора Содиқова судда ютди: блогер 25 млн сўм тўлайди
Шунингдек, Мирсаид Ҳайдаров журналистдан узр сўраб, постларини ўчиради.
Фуқаролик ишлари бўйича Тошкент шаҳар суди Анора Содиқова даъвоси юзасидан Шайхонтоҳур тумани суди чиқарган қарорни бекор қилди. Бу ҳақда инсон ҳуқуқлари ҳимоячиси Абдураҳмон Ташанов маълум қилди.
Маълум бўлишича, Блогер "Муфаса" - Мирсаид Ҳайдаров 25 миллион сўм маънавий зарар ва 5 миллион сўм бошқа зарарларни қоплайди. Шунингдек, у журналист Анора Содиқовадан узр сўраб, постларини ўчиради.
Эслатиб ўтамиз, журналист Анора Содиқова Муфаса тахаллуси билан танилган блогер Мирсаид Ҳайдаров устидан судга мурожаат киритган. У ўз мурожаатида блогер Муфаса томонидан Фасебоокъда ёзилган пост орқали қадр-қиммати ва ишчанлик обрўсига путур етказилгани ҳамда туҳматга учрагани ҳақида баён қилган.
Мазкур шикоятни кўриб чиқиш судья Дилноза Шоматова раислигида 26 февраль куни бошланган. 28 май куни Фуқаролик ишлари бўйича Шайхонтоҳур туманлараро суди журналист Анора Содиқованинг Фуқаролик кодексининг 100-моддаси (Шаън, қадр-қиммат ва ишчанлик обрўсини ҳимоя қилиш) асосидаги шикоятини қаноатлантирмаслик бўйича қарор чиқаради.
Ҳолат кенг жамоатчилик, ОАВ вакиллари ва ҳуқуқ фаолларининг норозилигига сабаб бўлган. Журналист Анора Содиқова ишни қайта кўриб чиқиш учун апеляцияга топширган эди. Айни пайтда Фуқаролик ишлари бўйича Тошкент шаҳар суди Анора Содиқова даъвоси юзасидан Шайхонтоҳур тумани суди чиқарган қарорни бекор қилди.
