“Навоийазот” чангсимон тутун бўйича айбловларга жавоб берди

“Навоийазот” акциядорлик жамияти атроф-муҳитнинг ифлосланиши юзасидан тарқалган хабарларга муносабат билдириб, айрим даъволарни асоссиз деб атади. Компаниянинг таъкидлашича, 13–19 ва 21 июль кунлари Навоий шаҳрида кузатилган чангсимон тутун ҳодисаси билан корхона фаолияти ўртасида боғлиқлик аниқланмаган.

 

"Навоийазот" томонидан ҳавони мониторинг қилиш учун ўрнатилган 500 дан ортиқ замонавий кузатув камераси орқали аниқланганидек, тутун манбаси корхона ҳудудидан эмас, балки шаҳарнинг ғарбий қисмидан ҳавога кўтарилиб, шамол таъсирида саноат зонасидан ўтиб бутун шаҳарга тарқалган.

 

Шу муносабат билан, “Ўзкимёсаноат” АЖ вилоят экология бошқармасининг 19 июль куни “Навоийазот” лаборатория мутахассислари билан биргаликда ҳаво таҳлили ўтказилгани ҳақидаги баёнотини инкор этди. Корхона ушбу тадбирдан бехабар бўлганини, ҳамкорликда ҳеч қандай мониторинг ишлари олиб борилмаганини маълум қилди.

 

Экологик таҳлиллар асосида атмосфера таркибида аммиак ва водород сульфид миқдори юқори бўлгани айтиб ўтилган бўлса-да, компания бунга эътироз билдирмоқда. Уларнинг маълумотига кўра, 19 июль эрталаб ўтказилган ички мониторингда аммиак мавжуд эмаслиги қайд этилган. Бундан ташқари, водород сульфид манбаси ҳисобланган тиомочевина цехи эса февраль ойидан буён ишламаяпти.

 

Шунингдек, “Навоийазот” АЖсида кўмир ишлатилмаслиги сабабли, карбонат ангидрид (углерод икки оксиди) ажралиб чиқиши эҳтимоли ҳам инкор қилинмоқда.

 

Атмосфера мониторинги ва ифлослантирувчи ташламаларни назорат қилиш учун корхона томонидан 6 миллиард сўмдан ортиқ маблағ эвазига газ анализаторлари ва стационар назорат постлари ўрнатилгани, чанг ва газ ажралишига йўл қўймаслик учун эса бир нечта цехга замонавий тозалаш ускуналари — скрубберлар жойлаштирилгани маълум қилинди.