Ўзбекистон давлат идораларида 128 мингдан ортиқ қонунбузарлик аниқлангани маълум қилинди
Хизмат кўрсатишда энг кўп қоидабузарлик “Ҳудудгазтаъминот”да қайд этилди.
Адлия вазирлигининг маълумотларига кўра, 2025 йилнинг дастлабки олти ойи давомида Ўзбекистон давлат идоралари томонидан аҳолига хизмат кўрсатиш жараёнида 128 мингдан зиёд қонунбузарлик ҳолатлари қайд этилган.
Қоидабузарликларнинг энг кўпи хизматни белгиланган муддатда кўрсатмаслик билан боғлиқ — бундай ҳолатлар сони 89,8 мингга етган. Шунингдек, хизматни асослантирилмаган ҳолда рад этиш бўйича 23,8 мингта мурожаат қайд этилган. 814 та ҳолатда эса фуқаролардан ортиқча ҳужжатлар талаб қилинган.
Статистикага кўра, энг кўп қоидабузарликлар “Ҳудудгазтаъминот” тизимида кузатилган — 12,9 мингта. Ундан кейинги ўринларда Кадастр агентлиги (12,6 мингта), Соғлиқни сақлаш вазирлиги (12,2 мингта) ва “Ўзсувтаъминот” ДУК (7,5 мингта) жойлашган.
Шунга қарамай, кўрсаткичларда ижобий динамикага ҳам эришилган: қонунбузарликлар сони ўтган йилнинг шу даврига нисбатан 3,2 бараварга камайган. Хусусан, хизмат кўрсатиш муддати билан боғлиқ муаммолар 3,5 баравар, хизматни рад этиш ҳолатлари эса 2,3 баравар қисқарган.
