“Мубашшир Аҳмад”га нисбатан жиноят иши судга оширилди
Турсуновга Исроил-Ғазо бўйича билдирган ижтимоий тармоқдаги фикрлари учун ҳам айблов қўшилган.
“Мубашшир Аҳмад” тахаллуси билан танилган Алишер Турсуновга нисбатан қўзғатилган жиноят иши якунига етказилиб, тегишли судга оширилди. Бу ҳақда унинг адвокати Руслан Содиқов ўзининг Facebook саҳифасида маълум қилган.
Расмий маълумотларга кўра, А.Турсунов Жиноят кодексининг 244⁻3-моддаси — “Диний экстремизм ва ақидапарастлик ғояларини тарғиб этувчи материалларни тайёрлаш, сақлаш ва оммавий ахборот воситалари орқали тарқатиш” билан айбланмоқда.
Адвокатнинг таъкидлашича, Турсуновга қўйилган айбловлар қаторига унинг ижтимоий тармоқларда Исроил–Ғазо можароси бўйича билдирган фикрлари ҳам киритилган.
Жиноят иши дастлаб 2023 йил 11 август куни Тошкент шаҳри Шайхонтоҳур тумани ИИБ ҳузуридаги тергов бўлими томонидан қўзғатилган. Тергов давомида унга диний мазмундаги материалларни қонунчиликка хилоф тарзда тарқатганлик гумони қўйилган.
Ҳозирда жиноят иши суд муҳокамасига тайёрланмоқда. Суд мажлиси санаси ва бошқа тафсилотлар ҳозирча ошкор этилмаган.
