Наманганда икки вояга етмаган бола чўкиб кетди
Ҳалок бўлган болалардан бирининг жасади икки кундан кейин топилган, иккинчи болани қидириш ишлари эса беш кундан бери давом этмоқда.
Ижтимоий тармоқларда тарқалган хабарларга кўра, Наманганда икки нафар мактаб ўқувчиси Шимолий Фарғона каналига чўмилиш учун келиб, чўкиб кетган. Ушбу ҳодисада болалардан бири ҳалок бўлиб, жасади икки кундан кейин топилган, иккинчисини эса қидириш ишлари беш кундан бери давом этаётгани айтилган.
Расмий маълумотларга кўра, 2024 йил 23 июль куни соат 13:48 да 112–ягона диспетчерлик хизматига Наманган тумани Миришкор маҳалласида яшовчи, 2009 йилда туғилган вояга етмаган ўсмир сувда чўкиб кетгани ҳақида хабар келиб тушган. Шундан сўнг зудлик билан сув усти ва сув ости қидирув ишлари бошланган.
Ҳозирда Наманган, Чуст ва Поп туманларининг Фавқулодда вазиятлар бўлимларига қарашли ёнғин-қутқарувчилар ҳамда бошқарма таркибидаги ғаввослар томонидан каналнинг сув ости ва сув юзасида излаш ишлари олиб борилмоқда. Қидирув ишлари узлуксиз давом эттирилаётгани билдирилди.
Наманган вилояти Фавқулодда вазиятлар бошқармаси Ахборот хизматининг маълум қилишича, ушбу фожиали ҳодиса бўйича тўлиқ расмий тафсилотлар эълон қилинади. Шу билан бирга, ФВБ аҳолига сув ҳавзаларида эҳтиёткорлик чораларига қатъий риоя қилишни тавсия қилмоқда.
