Лазизбек Муллажоновнинг допинг масаласига оид тарқалган миш-мишларга расмий изоҳ берилди
Спортчи 2024 йил ноябрида соч кўчириб ўтказиш амалиёти вақтида тавсия этилган дори воситалари туфайли тақиқланган моддаларга алоқадор бўлиши мумкин.
Сўнгги кунларда ижтимоий тармоқларда Ўзбекистон миллий терма жамоаси аъзоси, Париж–2024 Олимпиадаси олтин медали совриндори Лазизбек Муллажоновда допинг моддаси аниқлангани ва унинг натижалари бекор қилиниши мумкинлиги ҳақида тасдиқланмаган хабарлар тарқалмоқда.
Ўзбекистон бокс федерацияси ушбу масалага аниқлик киритарар экан, қуйидагиларни маълум қилади:
Лазизбек Муллажонов бугунги кунда профессионал боксда фаолиятини давом эттирмоқда. У мунтазам равишда халқаро допинг қоидаларига риоя қилган ва топширган барча синовларда салбий натижалар қайд этилган.
Жорий йилнинг 11-июнь куни Халқаро Тест агентлиги (ITA) томонидан спортчидан навбатдаги допинг тест олинган. Шу тест натижаларига кўра, организмда тақиқланган моддаларнинг излари аниқлангани ҳақида федерацияга расмий хат келиб тушган.
Мазкур ҳолатга аниқлик киритарар экан, спортчимиз 2024 йил 19-ноябрь куни Фарғона шаҳридаги хусусий клиникада соч кўчириб ўтказиш бўйича тўрт босқичли жарроҳлик амалиёти ўтказган. Операциядан кейин клиника томонидан тавсия этилган дори воситаларининг айримларида тақиқланган моддалар бўлиши эҳтимоли мавжудлиги қайд этилган.
Ўзбекистон бокс федерацияси ва спортчининг ўзи ITAга барча зарурий ҳужжатларни тақдим этган. Ҳозирда расмий якуний қарор кутилмоқда.
Ўзбекистон бокс федерацияси ижтимоий тармоқларда тарқалган, гўёки спортчининг Париж–2024 Олимпиадасидаги олтин медали бекор қилинади, деган хабарлар асоссиз эканини қатъий маълум қилади. Мазкур ҳолат Олимпия ўйинларидаги расмий натижага таъсир кўрсатмайди.
