10 ёшли ҳиндистонлик шахматчи рекорд ўрнатди
Бодҳана Сиванандан — аёллар орасида гроссмейстер устидан ғалаба қозонган энг ёш шахматчи бўлди.
10 ёшли Бодҳана Сиванандан Буюк Британия шахмат чемпионатида тарихий натижага эришди. Шимоли-ғарбий Лондондан бўлган иқтидорли қиз финал босқичида 60 ёшли гроссмейстер Пит Уэллсни мағлуб этиб, бундай ютуққа эришган энг ёш аёл ўйинчи сифатида қайд этилди.
Сиванандан 10 ёшида бу маррани забт этди. Шу тариқа у америкалик Карисса Йипнинг рекордини янгилади — Йип 2019-йилда 10 йил 11 ой 20 кунлигида гроссмейстерни енгган эди. Бу ҳақда Халқаро шахмат федерацияси (FIDE) маълум қилди.
Ушбу натижадан сўнг Бодҳана халқаро аёллар устаси (WIM) унвонига эга бўлди. Бу аёллар учун махсус ажратилган “аёллар гроссмейстери” даражасидан бир поғона паст ҳисобланади. Шахматда энг олий даража эса — гроссмейстер бўлиб, ҳозирги жаҳон чемпиони Гукеш Доммаражу ва дунё рейтингида 1-ўринда турган Магнус Карлсен шундай унвонга эга.
Қизнинг отаси аввалроқ BBC’га берган интервьюсида оилаларида ҳеч ким шахмат билан шуғулланмаганини айтган. Бодҳана эса 5 ёшида, пандемия даврида, отасининг дўстидан ҳадя сифатида келган ўйинчоқлар ва китоблар орасида шахмат тахтасини кўриб, қизиқиб қолганини сўзлаб берди.
“Мен шахмат доналаридан ўйинчоқ сифатида фойдаланмоқчи бўлгандим. Лекин отам менга уларни ўйинга ишлатишни таклиф қилди. Шундай қилиб мен шахматни ўрганишни бошладим”, — дейди у.
