Россияда камералар одамларнинг миллатини аниқлай бошлади
Санкт-Петербургда 50 минг камера одамларнинг умумий этник хусусиятларини фарқлай оладиган технология билан жиҳозланди.
Санкт-Петербург шаҳрида юзни аниқлаш технологиясига эга бўлган видеокузатув камералар янги функциялар билан жиҳозланди. Ахборот технологиялари қўмитаси раиси ўринбосари Игор Никоновнинг маълум қилишича, 2025 йил март ойидан бошлаб 50 мингга яқин камера инсонларнинг Кавказ, Шарқий Осиё, Марказий Осиё, Осиё ва Европа қиёфаси, шунингдек, негроид ирқига хос белгиларига фарқ қила олиш имкониятига эга бўлди.
Расмийларнинг қайд этишича, ушбу тизим миллатни аниқ аниқлай олмайди, балки фақат умумий этник белгиларни ажрата олади. Мазкур имконият ҳуқуқни муҳофаза қилувчи органларга мигрантлар кластерларини аниқлаш, ноқонуний яшаш жойларини кузатишда ёрдам бериши кўзда тутилган.
Шу билан бирга, қўмита вакиллари тажриба натижалари ҳақида якуний хулоса чиқариш учун ҳали эрта эканини таъкидлашди. Жиноятларнинг очилиши ва кузатув самарадорлиги бўйича статистик маълумотлар йил охирида эълон қилинади.
Мазкур ташаббус 2025 йил февралида кўтарилган бўлиб, давлат идоралари ўртасида кенг муҳокама ва баҳсларга сабаб бўлган эди.
