Президент Шавкат Мирзиёев деҳқон, фермерлар ҳамда барча қишлоқ хўжалиги ходимларини табриклади

Президент Шавкат Мирзиёев Ўзбекистон тарихида илк бор 5 миллион тоннадан ортиқ пахта хирмони яратилгани билан деҳқон ва фермерлар, кластер ходимлари, дала меҳнаткашларини табриклаб, соҳада эришилган ютуқлар ва келгуси йил учун белгиланган вазифалар ҳақида маълум қилди.

 

Давлат раҳбарининг таъкидлашича, иқлим ўзгариши билан боғлиқ қийинчиликларга қарамай, пахта ҳосили ёғингарчиликли кунларга қолдирилмасдан, соҳанинг ички имкониятлари ҳисобидан йиғиб олинган.

 

Қайд этилишича, сўнгги йилларда пахтачиликда ҳосилдорлик 2,7 баробар ошиб, гектарига 21 центнердан 56 центнерга етган. Сув тежовчи технологияларни жорий этиш ҳисобига сув сарфи 1990 йилларга нисбатан икки баробар камайган.

 

Бу йил қарийб 400 минг гектар майдонда ўртача ҳосилдорлик гектарига 70 центнерга етган. Салкам 70 минг гектарда эса 100–110 центнергача ҳосил олинган. Шунингдек, қарийб 1 мингта фермер хўжалиги ва кластер ўртача 100 центнерлик ҳамда ундан юқори натижага эришган.

 

Етиштирилган ҳосилнинг 85 фоизи 3 мингдан ортиқ пахта териш машинаси ёрдамида 30–35 кун ичида йиғиб олинган. Жиззах ва Сирдарё вилоятларида механизациялаштириш даражаси 100 фоизга етган.

 

Шунингдек, бу йил фермерлар пахтадан 13–14 триллион сўм соф фойда олиши кутилмоқда.

 

Шавкат Мирзиёев келгуси йилда серҳосил уруғлик навларидан фойдаланиш, агродрондан фойдаланиш, сув ва энергия тежовчи технологиялар ҳамда сунъий интеллектни жорий этиш орқали пахта ҳосилдорлигини ўртача 65–70 центнерга етказиш мақсад қилинганини билдирди.

 

Давлат раҳбари пахтачилик соҳасида амалга оширилаётган ислоҳотлар натижасида мажбурий меҳнатга барҳам берилгани, экин майдонлари қисқартирилгани ва замонавий агротехнологияларга устувор аҳамият қаратилаётганини ҳам таъкидлади.