“Пахтакор” Ўзбекистон кубоги соҳиби бўлди
Жамоа 1:0 ҳисобида ғолиб бўлди ва шу тариқа 14-марта кубок соҳибига айланди.
Бугун, 29 октябрь куни Андижондаги “Бобур” аренасида Ўзбекистон кубоги финали бўлиб ўтди. Беллашувда Камолиддин Тожиев бошқарувидаги Тошкентнинг “Пахтакор” жамоаси Александр Ҳомяков раҳбарлик қилаётган “Бухоро”га қарши майдонга тушди.
Уйиндаги ягона гол иккинчи тайм ўрталарда қайд этилди. 63-дақиқада Ҳожимат Эркинов рақиб дарвозасини аниқ нишонга олиб, “Пахтакор”ни ҳисобда олдинга олиб чиқди. Қолган дақиқаларда ҳам жамоаларнинг саъй-ҳаракатларига қарамай, натижа ўзгармади.
Белгиланган вақт якунига яқин “Бухоро” ҳисобни тенглаштирганди, бироқ бош ҳакам голни бекор қилди. VARдан сўнг Марко Колакович офсайд ҳолатида экани тасдиқланди.
Шу тариқа “Пахтакор” жамоаси 2025 йилги Ўзбекистон кубогини қўлга киритди.
