Тимур Кападзе Ўзбекистон терма жамоасидан кетганлиги тасдиқланди
Мутахассис мураббийлик фаолиятини бош мураббий сифатида давом эттиришга қарор қилди.
Ўзбекистон миллий терма жамоаси ёрдамчи мураббийи Тимур Кападзе терма жамоадаги лавозимидан озод этилди. Бу ҳақда Ўзбекистон футбол ассоциасияси (ЎФА) расмий баёнот берди. Маълум қилинишича, Кападзе ўз фаолиятини янги босқичда, бош мураббий сифатида давом эттириш истагини билдирган.
ЎФА маълумотига кўра, Кападзега бошқа таклиф тушган ва у энди мураббийлик фаолиятини мустақил равишда, жамоа бошлиғи сифатида юритишни маъқул кўрган. Шу сабаб унинг аризаси раҳбарият томонидан кўриб чиқилиб, ҳурмат билан қабул қилинган.
“Ўзбекистон футбол ассоциасияси Тимур Кападзенинг ўзбек футболи ривожига қўшган ҳиссаси учун миннатдорчилик билдиради ва унинг келгуси фаолиятида улкан муваффақиятлар тилайди”, дейилади расмий хабарда.
Эслатиб ўтамиз, 2024 йилнинг ёзида Тимур Кападзе бошчилигида Ўзбекистон миллий жамоаси БАА устидан муҳим ғалабани қўлга киритиб, ЖЧ саралаш босқичида муҳим натижага эришган эди.
