Лазизбек Муллажонов 3 йилга дисквалификация қилинди
Боксчининг 2025 йил 11 июнь куни мусобақадан ташқари пайтда топширган намунасида тақиқланган метастерон метаболит моддаси аниқланган.
Халқаро тест агентлиги (ITA) ўзбек боксчиси, Олимпиада чемпиони Лазизбек Муллажоновни допинг-тест мусбат чиққани сабаб 3 йилга дисквалификация қилди.
2025 йил 11 июнь куни ўтказилган режалаштирилмаган тестда спортчидан олинган намунада метастерон метаболитлари аниқланган. Муллажонов қоидабузарликни инкор этмаган ва айбни эрта тан олгани учун одатдаги 4 йиллик жазоси 1 йилга қисқартирилган.
Шу тариқа, боксчи 2028 йил 21 июлгача мусобақаларда иштирок эта олмайди. Шунингдек, унинг 2025 йил 11 июндан 22 июлгача бўлган барча натижалари бекор қилинди.
