Ўзбекистон миллий жамоаси 2026 йилги Жаҳон чемпионати гуруҳ босқичи ўйинларини АҚШ ва Мексикада ўтказади
Жаҳон чемпионати 11 июндан 19 июлгача АҚШ, Канада ва Мексикада бўлиб ўтади.
ФИФА томонидан эълон қилинган 2026 йилги Жаҳон чемпионати тақвими Ўзбекистон миллий терма жамоасининг гуруҳ босқичидаги учрашувларини расман тасдиқлади. Унга кўра, миллий жамоа ўзининг илк ўйинини 18 июнь куни Тошкент вақти билан 08:00 да Мексиканинг пойтахти Мехико шаҳрида Колумбияга қарши ўтказади.
Гуруҳдаги иккинчи баҳс 23 июнь куни соат 23:00 да АҚШнинг Хюстон шаҳрида бўлиб ўтади. Унда Ўзбекистон терма жамоаси кучли рақиблардан бири — Португалия билан тўқнаш келади.
Гуруҳ босқичидаги якуний учрашув 28 июнь куни соат 05:30 да АҚШнинг Атланта шаҳрида ўтказилади. Ушбу ўйинда Ўзбекистон термасига рақиб сифатида Янги Каледония, Ямайка ва Конго Демократик Республикаси ўртасидаги қитъалараро плей-офф ғолиби қарши чиқади.
2026 йилги Жаҳон чемпионати 11 июндан 19 июлгача АҚШ, Канада ва Мексикада бўлиб ўтади. Бу йили мусобақада илк бор 48 жамоа иштирок этади.
