Молдова ҳам МДҲдан чиқишга ҳаракатларни бошлаб юборди
Ташқи ишлар вазирга кўра, эҳтимол февраль ойи ўрталарига қадар ҳукумат даражасидаги жараёнларни якунлаши мумкин.
Молдова ташқи ишлар вазири Михай Попошой “Radio Moldova” эфирида давлатнинг МДҲ аъзолигига асос бўлган битимларни бекор қилиш жараёни бошлангани ва яқин вақт ичида Парламентга тақдим этилиши ҳақида гапирди.
Унинг айтишича, ҳозирда вазирлик МДҲни ташкил этувчи асосий ҳужжатларни бекор қилиш (денонсация қилиш) устида ишламоқда. Гап 1993 йил 22 январда Минскда имзоланган МДҲ низоми, 1991 йил 8 декабрдаги МДҲни тузиш тўғрисидаги битим, шунингдек 1991 йил 22 декабрдаги унга илова ҳақида бормоқда.
“Бу шуни англатадики, Молдова Республикаси расман МДҲ аъзоси бўлмайди. МДҲда бўлишимизнинг асосини ташкил этган ушбу учта асосий битимни бекор қилиш бизга шуни айтиш ҳуқуқини беради-ки, ҳуқуқий нуқтайи назардан… чунки амалда биз анчадан бери иштирокимизни деярли тўхтатган эдик, бироқ ҳуқуқий жиҳатдан ҳали ҳам у ерда эдик. Ушбу учта фундаментал битим бекор қилингач, Молдова Республикаси расман МДҲ таркибига кирмайди. Бу жараён аллақачон бошланган, биз яқинда бундай қарор қабул қилдик, келишув жараёни ишга туширилган”, — деди Михай Попшой.
Вазирга кўра, эҳтимол февраль ойи ўрталарига қадар ҳукумат даражасидаги жараёнларни якунлаши мумкин.
"Биз бу жараённи Ташқи ишлар вазирлигида бошладик ва ҳужжатларни келишув учун юбордик. Битимларнинг бир қисми, агар улар Европа маконига интеграциямизга зид бўлмаса ва муайян фойда келтирса, уларни бекор қилишга ҳеч қандай асос йўқ. Аммо ҳуқуқий жиҳатдан, жуда яқин вақт ичида, Молдова Республикаси расман МДҲ аъзоси бўлмайди”, — дея қўшимча қилди вазир миллий радиода.
Михай Попшойнинг сўзларига кўра, Молдова Республикаси МДҲ билан жами 283 та битим имзолаган, шулардан 71 таси бекор қилинган, тахминан 60 таси эса бекор қилиш жараёнида.
Маълум бўлишича, Молдованинг МДҲ билан битимларини бекор қилиш жараёни 2022 йил февраль ойида Россиянинг Украинага бостириб киришига кўп ўтмай бошланган.
Ўтган йил охирида Парламент Россия Федерацияси билан маданий ҳамкорлик тўғрисидаги битимни ҳам бекор қилди, бу эса Кишинёвдаги Россия Фан ва Маданият Марказининг ёпилишини англатади.
Ўшанда Маданият вазири Кристиан Жардан шундай деган эди: “Россия Маданият Маркази аслида маданий марказ эмас эди, у Молдова Республикасининг суверенитетини заифлаштиришга қаратилган фаолиятлар олиб борилган ниқоб остидаги марказ бўлган”.
Маълумот учун ҳозирги вақтда МДҲга 9 та давлат жумладан, Арманистон Озарбайжон, Беларус, Қозоғистон, Қирғизистон, Россия, Тожикистон, Ўзбекистон ва Молдова аъзо. Туркманистон ташкилотга кузатувчи мақомида иштирок этади.
