Трамп гренландияликларнинг ҳар бирига 1 миллион доллардан таклиф қилди
Гренландия аҳолисига АҚШга қўшилишни қўллаб-қувватлаш эвазига ҳар бир фуқарога молиявий рағбат берилиши мумкин.
АҚШ президенти Доналд Трамп Гренландия бўйича илгари сурилган “аср келишуви” ташаббусини янгича талқинда қайта кўриб чиқди. Унга кўра, агар Гренландия аҳолиси Қўшма Штатларга қўшилишни қўллаб-қувватласа, оролнинг ҳар бир фуқаросига бир миллион доллар миқдорида молиявий рағбат берилиши мумкин.
Daily Mail нашрининг хабар беришича, Гренландия аҳолиси сони тахминан 57 минг кишини ташкил этади, шундан 40 мингдан ортиғи сайлов ҳуқуқига эга. Таклиф барча аҳолига тааллуқлими ёки фақат сайловчиларгагина қаратилганми — ҳозирча аниқлик киритилмаган.
Гренландия халқига тўғридан-тўғри молиявий тўловлар амалга оширилиши ҳақидаги ғоя Оқ уй томонидан расман тасдиқланмаган. Бироқ Трамп маъмурияти илгари ҳам орол аҳолисини Даниядан ажралиб чиқиш ва АҚШ таркибига қўшилишга ундаш учун молиявий рағбатлантириш вариантларини муҳокама қилгани маълум. Ўша пайтда таклиф қилинаётган суммалар 10 минг доллардан 100 минг долларгача бўлган.
Гренландия расмийлари эса, орол сотилмаслигини бир неча бор қатъий таъкидлаб келмоқда. Уларнинг фикрича, Гренландиянинг келажаги фақат гренландияликлар ва Дания томонидан мустақил тарзда ҳал қилиниши лозим.
Давосдаги Жаҳон иқтисодий форумида сўзлаган нутқида Доналд Трамп Гренландия устидан назорат ўрнатишда куч ишлатиш режаси йўқлигини маълум қилди. Шунингдек, Гренландияни қўллаб-қувватлаган Европа давлатларига нисбатан жорий этилиши режалаштирилган тарифлар 1 февралдан кучга киритилмаслигини билдирди. Унинг айтишича, Гренландия ва умуман Арктика минтақаси бўйича келажакдаги келишувлар учун муҳим асос аллақачон шакллантирилган.
Трамп Қўшма Штатлар Гренландияни сотиб олиш масаласида яқин вақт ичида музокараларни бошлаш ниятида эканини ҳам қайд этди. У Американинг оролни ҳимоя қилиш борасида энг қулай стратегик позицияга эга эканини таъкидлаб, Гренландияни “катта ва гўзал муз бўлаги” деб атади. Трамп Иккинчи жаҳон уруши даврида АҚШ Гренландияни назорат қилганини, бироқ кейинчалик уни Данияга қайтарганини ва ҳозир бу қарордан афсусда эканини ҳам эслатиб ўтди.
