Санкт-Петербургда мигрантларнинг савдо соҳасида ишлаши тақиқланиши мумкин
Бунга январь ойи охирида “City Mall” савдо марказида юз берган қотиллик сабаб сифатида кўрсатилмоқда, гумондорлардан бири Ўзбекистон фуқароси бўлган.
Санкт-Петербургда мигрантларга чакана ва улгуржи савдо дўконларида ишлашни тақиқлаш ташаббуси муҳокама қилинмоқда. Ушбу масала январь ойи охирида савдо марказида содир бўлган фожиадан сўнг кун тартибига чиққан.
Маълум қилинишича, воқеа “City Mall” савдо марказидаги Перекресток супермаркетида юз берган. Икки нафар қўриқчи ўғирликда гумон қилинган 24 ёшли мижоз билан тортишув жараёнида жисмоний тўқнашув юзага келган, оқибатда жабрланувчи шифохонага етказилган бўлсада, унинг ҳаётини сақлаб қолишнинг имкони бўлмаган.
Россия Тергов қўмитаси мазкур ҳолатни гуруҳ бўлиб содир этилган қотиллик сифатида баҳолаган. Хабар қилинишича, қўриқчилардан бири Ўзбекистон фуқароси бўлиб, терговдан қочиб, қидирувга берилган.
Ташаббусни Санкт-Петербург ва Ленинград вилояти Ички ишлар вазирлиги Бош бошқармаси раҳбари Роман Плугин шаҳар парламентига тақдим этган йиллик ҳисоботида илгари сурган. Унинг таъкидлашича, айрим савдо тармоқлари мигрантларни расмий равишда бошқа лавозимларда ишга расмийлаштириб, амалдаги чекловларни четлаб ўтмоқда.
Ҳодиса ортидан ҳуқуқни муҳофаза қилувчи органлар томонидан савдо тармоқларида иммиграция қонунчилигига риоя этилиши юзасидан текширувлар ўтказилган. Сўнгги рейдлар давомида 64 нафар ноқонуний мигрант аниқлангани маълум қилинган.
Шунингдек, амалдаги қонунчиликка кўра, чет эл фуқароларининг хусусий қўриқлаш компанияларида ишлаши тақиқланган. Янги қонун 2026 йил 1 сентябрдан кучга кириши режалаштирилган.
Плугин маълумотига кўра, 2025 йилда дўконларда лицензия асосида ишлаган беш мингга яқин ходим орасида ноқонуний ишлаётган мигрантлар ҳам бўлган. Шу муносабат билан чакана ва улгуржи савдо соҳасида меҳнат мигрантларини тўлиқ тақиқлаш ташаббуси ишлаб чиқилмоқда.
Қайд этилишича, Санкт-Петербургда визасиз давлатлардан — жумладан Ўзбекистон, Озарбайжон, Тожикистон, Молдова ва Украинадан келган мигрантларнинг такси ҳамда етказиб бериш хизматларида ишлашига нисбатан чекловлар аллақачон жорий этилган.
