2025 йилда Россиядан 72 минг нафар мигрант депортация қилинган
Ички ишлар вазири қоидабузар мигрантларни янада кўпроқ аниқлаш учун қўшимча маблағ зарурлигини билдирди.
2025 йил якунларига кўра, қонунбузарликлар содир этгани сабабли 72 минг нафар хорижий фуқаро Россия ҳудудидан депортация қилинган. Бу ҳақда мамлакат ички ишлар вазири Владимир Колоколтсев маълум қилди.
Вазирнинг таъкидлашича, ушбу кўрсаткич ҳуқуқ-тартибот органлари томонидан миграция соҳасида олиб борилган назорат ва профилактик чора-тадбирлар натижасидир. Мазкур маълумотлар Давлат Думасининг Хавфсизлик ва коррупцияга қарши кураш қўмитаси йиғилишида тақдим этилган.
Колоколтсев Ички ишлар вазирлиги мавжуд ресурслар доирасида ноқонуний фаолият юритаётган ва депортация қилиниши лозим бўлган шахсларни аниқлаш ишларини давом эттираётганини билдирган. Шу билан бирга, у бундай қоидабузарларни янада кенгроқ аниқлаш ва тегишли чораларни кучайтириш учун қўшимча молиявий маблағлар зарурлигини қайд этган.
Расмийларга кўра, миграция қонунчилигини бузган шахсларни аниқлаш, уларни рўйхатга олиш ва депортация қилиш жараёнлари давлат хавфсизлигини таъминлаш ҳамда қонун устуворлигини мустаҳкамлашга қаратилган.
