Россия ОАВларида Ўзбекистон Президентининг расмий самолёти “АҚШ ҳарбий самолёти” деб аталди

 

Россиянинг айрим Телеграм каналлари ҳамда бир қатор оммавий ахборот воситаларида АҚШдан ҳавога кўтарилиб, Россия ҳаво ҳудуди орқали парвоз қилган “номаълум Boeing 787” ҳақида турли тахминий хабарлар тарқатилди. Айрим нашрлар ушбу бортни “АҚШ ҳарбий-ҳаво кучларига тегишли самолёт” сифатида талқин қилган.

 

Очиқ манбаларда, жумладан парвозларни кузатиш сервисларидаги маълумотларга таянилган ҳолда, самолёт Вашингтон яқинидаги Эндрюс авиабазасидан учгани, Мурманск вилояти устидан Россия ҳаво ҳудудига киргани ва кейинчалик кузатув тизимларида тўлиқ акс этмагани ҳақида хабарлар берилган. Шунингдек, айрим манбаларда борт Қозоғистон чегараси томон йўл олгани қайд этилган.

 

Аслида эса мазкур лайнер Ўзбекистон Президенти Шавкат Мирзиёевнинг расмий самолёти бўлиб, давлат раҳбари АҚШга амалга оширилган ташриф доирасида “Тинчлик кенгаши”нинг биринчи саммитида иштирок этгач, Тошкентга қайтаётган бўлган.

 

Мутахассисларнинг таъкидлашича, ҳукумат делегациялари ва махсус рейслар кўпинча очиқ кузатув платформаларида тўлиқ ёки доимий равишда акс этмаслиги амалиётда кенг учрайдиган ҳолат ҳисобланади.

 

Очиқ манбаларга кўра, самолёт Вашингтон шаҳридан Тошкент вақти билан 00:12 да ҳавога кўтарилган ҳамда Канада, Гренландия, Европа давлатлари, Россия ва Қозоғистон ҳудудлари устидан парвоз қилиб, соат 12:14 да Тошкент шаҳрига етиб келган.