Ўзбекистон уламолари президент Шавкат Мирзиёевга миннатдорлик мактуби йўллади
Мактубда “Вақф” фондига 750 миллиард сўм, Ижтимоий ҳимоя агентлиги орқали 300 миллиард сўм маблағ ажратилиши, масжидларда хатми Қуръонларнинг тизимли ташкил этилиши ва йирик маърифий лойиҳалар эътироф этилди.
Ўзбекистон мусулмонлари идораси Уламолар кенгаши аъзолари ва таниқли уламолар рамазон ойи муносабати билан Ўзбекистон Президенти Шавкат Мирзиёевга табрик ва миннатдорлик мактуби йўллади.
Мактубда давлат раҳбарининг аҳолини ижтимоий ҳимоя қилиш борасидаги саъй-ҳаракатлари, рамазонда эҳтиёжмандларга ажратган маблағлари ва диний соҳадаги ислоҳотлари алоҳида қайд этилган. Хусусан, 16 февраль куни рамазон ойида эҳтиёжманд аҳолини ижтимоий ҳимоя қилиш масалаларига бағишлаб ўтказилган йиғилишда қабул қилинган “Вақф” хайрия жамоат фондига 750 миллиард сўм, Ижтимоий ҳимоя миллий агентлиги орқали эса 300 миллиард сўм маблағ ажратилиши тўғрисидаги қарорлари минглаб оилалар учун катта кўмак бўлгани таъкидланган.
Уламолар шунингдек, мамлакатда 2000 дан зиёд масжидларда хатми Қуръонларнинг тизимли ташкил этилиши, Имом Бухорий ёдгорлик мажмуаси ва Ислом цивилизацияси маркази каби маърифий лойиҳалар амалга оширилаётганини ҳам эътироф этилган.
Мактуб сўнгида президентга мустаҳкам соғлик, оилавий бахт-саодат ва масъулиятли фаолиятида муваффақиятлар тилаб, юрт тинчлиги, халқ фаровонлиги ва рамазон ойининг баракоти учун дуолар қилинган.
Мактуб муфтий — шайх Нуриддин Холиқназар, шайх Абдулазиз Мансур, Раҳматулло қори Обидов, Ҳомиджон домла Ишматбеков, Зайниддин домла Эшонқулов, шайх Раҳматуллоҳ Термизий, Раҳимберди домла Раҳмонов, шайх Алижон қори Ҳайдаров, Исмоил Муҳаммад Содиқ, Муҳаммадаюбхон домла Ҳомидов, Ҳабибуллоҳ қори Абдураззоқов ва барча ҳудудлардаги бош имом-хатиблар номидан йўлланган.
