Хитой—Қирғизистон—Ўзбекистон темирйўли 2030 йилда ишга туширилади
Мазкур темирйўли қурилиши якунланиши билан мамлакатлар янги транзит йўлларига эга бўлади ва юк етказиб бериш вақти қисқаради.
Марказий Осиё мамлакатлари транзит салоҳиятини оширишга қаратилган янги темирйўл лойиҳаси 2030 йилда ишга туширилиши режалаштирилмоқда. Бу ҳақда Қирғизистон президенти Садир Жапаровга таяниб, 24.кг хабар берди.
Жапаровнинг сўзларига кўра, Хитой—Қирғизистон—Ўзбекистон темирйўли қурилиши якунланиши билан мамлакатлар янги транзит йўлларига эга бўлади ва юк етказиб бериш вақти сезиларли даражада қисқаради. Бу эса минтақа учун янги бозорларга чиқиш имкониятларини кенгайтиради.
Президент Жапаров бугунги кунда темирйўл бўйлаб инфратузилмани ривожлантириш ва савдо-логистика марказларини қуриш давр талаби эканини таъкидлади.
Темирйўл қурилиши 2024 йил 27 декабрда бошланган бўлиб, 2025 йил 16 декабрь куни Бишкекда лойиҳани молиялаштириш бўйича кредит битими имзоланган.
Лойиҳанинг умумий қиймати 4,7 миллиард АҚШ долларини ташкил этади.
Маблағнинг қарийб ярми — 2,3 миллиард доллар Хитой томонидан 35 йил муддатга кредит сифатида уч давлат томонидан ташкил этилган қўшма лойиҳа компаниясига ажратилади. Кредитни қайтариш бевосита лойиҳа компанияси зиммасига юклатилади. Қолган 2,3 миллиард доллар эса қўшма компания устав капиталига киритилади. Унда Хитойнинг улуши 51%, Қирғизистон ва Ўзбекистоннинг улуши эса 24,5%дан бўлади.
2030 йилда темирйўл орқали йиллик юк ташиш ҳажми 8 миллион тонна, 2040 йилда 10 миллион тонна, 2050 йилда эса 13,5 миллион тоннани ташкил этиши кутилмоқда. Қирғизистон ҳукумати лойиҳа 30-40 йил ичида ўзини оқлашини билдирган.
Президент Жапаров шунингдек, лойиҳа минтақанинг халқаро аҳамиятини ошириш ва янги транзит алоқаларини яратишда муҳим роль ўйнашини таъкидлади.
