Абдуқодир Ҳусанов “Манчестер Сити”да март ойининг энг яхши футболчиси деб топилди
Ўзбекистонлик ҳимоячи ушбу соврин учун курашда жамоадошлари Родри ва Жереми Докуни ортда қолдириб, ғолиб бўлди.
Ўзбекистон терма жамоаси ҳимоячиси Абдуқодир Ҳусанов “Манчестер Сити” мухлислари ўртасида ўтказилган сўровнома натижаларига кўра март ойининг энг яхши футболчиси деб топилди.
Клуб матбуот хизматининг маълум қилишича, ўзбекистонлик футболчи ушбу соврин учун курашда жамоадошлари Родри ҳамда Жереми Докуни ортда қолдириб, ғолибликни қўлга киритган.
Қайд этилишича, Ҳусанов март ойи давомида жамоа сафида барқарор ва ишончли ўйини билан мухлислар эътирофига сазовор бўлган.
Шунингдек, бу мукофот футболчининг 2026 йилдаги иккинчи шахсий ютуғи ҳисобланади. У аввалроқ январ ойида ҳам “Манчестер Сити” мухлислари талқинига кўра ойнинг энг яхши футболчиси деб топилган эди.
Эслатиб ўтамиз, Абдуқодир Ҳусанов 2025 йил январ ойида Англиянинг “Манчестер Сити” клубига қўшилган. Шундан буён у жамоа сафида уч бор — 2025 йил февраль, 2026 йил январ ва март ойларида — ойнинг энг яхши футболчиси сифатида эътироф этилган.
