Россия ва Украина Пасха муносабати билан вақтинчалик сулҳга келишди
Украина Президенти ҳам Пасха таҳдидларсиз нишонланиши кераклигини билдирди.
Россия Украинадаги урушда Пасха байрами муносабати билан қисқа муддатли сулҳ жорий этишини маълум қилди. Бу ҳақда Кремль матбуот хизмати хабар берди.
Маълум қилинишича, Россия президенти Владимир Путин қарорига кўра, сулҳ 11 апрель соат 16:00 дан бошланиб, 12 апрель куни охиригача амал қилади. Шу давр мобайнида барча йўналишларда жанг ҳаракатларини тўхтатиш бўйича Россия Қуролли кучларига топшириқ берилган.
Хусусан, мудофаа вазири Андрей Белоусов ва Бош штаб бошлиғи Валерий Герасимовга отишмани тўлиқ тўхтатиш вазифаси юклатилган.
Кремль мазкур ташаббусга Украина томонидан ҳам жавоб бўлишини кутаётганини таъкидлади. Киев эса бу таклифга рози бўлди. Володимир Зеленскийнинг таъкидлашича, Пасха байрами “таҳдидларсиз” нишонланиши керак.
Шу билан бирга, Кремль матбуот котиби Дмитрий Песков ушбу сулҳ режими АҚШ ёки Украина билан олдиндан келишилмаганини билдирди. Унинг сўзларига кўра, бу қарор музокаралар жараёни билан боғлиқ эмас ва алоҳида ташаббус сифатида қабул қилинган.
Песков, шунингдек, уч томонлама музокаралар эҳтимолига тўхталиб, яқин келажакда АҚШ дипломатлари Украина масаласига кўпроқ эътибор қаратишига умид билдирди. У бугунги кунда бундай имкониятлар Яқин Шарқдаги вазият сабаб чекланганини ҳам қайд этди.
