Хитой АҚШ университетларида 80 та тарғибот гуруҳини ташкил этган — Пит Ҳегсет

АҚШ Мудофаа вазирлиги Хитой ҳукумати томонидан молиялаштириладиган 80 та тарғибот ташкилотини аниқлаган. Улар мамлакатнинг 30 та университетида фаолият юритган. Бу ҳақда Пентагон раҳбари Пит Ҳегсет Х ижтимоий тармоғида эълон қилинган видеомурожаатида маълум қилди.

 

Ҳегсетнинг айтишича, вазирлик сўнгги икки ой давомида ушбу ташкилотлар фаолиятини тугатиш билан шуғулланган. Унинг таъкидлашича, улар интеллектуал мулкни ўзлаштириш ва америкалик талабаларнинг дунёқарашига таъсир кўрсатиш билан шуғулланган.

 

Пентагон раҳбари мазкур тузилмалар амалда Хитойнинг халқаро маданий-маърифий марказлари тармоғи бўлган «Конфуций институтлари» фаолиятини давом эттирганини таъкидлади. АҚШ университетлари 2020 йилдан кейин ушбу институтларни оммавий равишда ёпишни бошлаган. Бунга АҚШ Давлат департаментининг уларни Хитойнинг хориждаги миссияси деб тан олиши сабаб бўлган.

 

University World News нашрининг хабар беришича, «Конфуций институтлари» билан ҳамкорликни тўхтатган айрим таълим муассасалари Хитой ҳукуматига миллионлаб доллар миқдоридаги субсидияларни қайтаришга мажбур бўлган.

 

Бироқ АҚШ Миллий олимлар ассоциациясининг 2022-йилги ҳисоботида айрим университетлар Хитой олий таълим муассасалари билан янги ҳамкорлик шартномаларини тузгани, янги марказлар очгани ва Хитой ҳукуматининг тегишли идораларидан маблағ олишда давом этгани қайд этилган.

 

Ҳегсетнинг маълум қилишича, АҚШ Мудофаа вазирлиги ушбу тузилмаларни миллий хавфсизликка таҳдид солувчи ташкилотлар рўйхатига киритган.

 

«Бу бизнинг ихтироларимизни ўзлаштиришга ёки ёшларимизни ўз давлатига қарши қайрашга уринаётган ҳар қандай мамлакат учун сабоқ бўлсин», — деди Пентагон раҳбари.