Туркияда Нетаняҳуга 4596 йилгача қамоқ жазоси берилиши сўралмоқда

Истанбулда “Сумуд флоти” кемаларига нисбатан халқаро сувларда амалга оширилган қуролли аралашув юзасидан тергов якунланиб, 35 нафар гумонланувчига нисбатан айблов хулосаси судга тақдим этилди. Улар орасида Исроил бош вазири Бинямин Нетаняҳу ҳам бор. Бу ҳақда "Hürriyet" газетаси хабар берди.

 

Бош прокуратуранинг Террор жиноятларини тергов қилиш бўлими олиб борган суриштирувга кўра, Ғазога инсонпарварлик ёрдамини етказиш мақсадида тузилган “Сумуд флоти” кемаларига Исроил хавфсизлик кучлари томонидан халқаро сувларда ҳужум қилинган.

 

Тергов материалларида қайд этилишича, ҳужумни режалаштириш ва амалга оширишда иштирок этгани аниқланган, жумладан ичида Исроил ҳукуматидаги амалдорлар ҳам бўлган 35 нафар шахсга нисбатан ҳибсга олиш қарори чиқарилган ва айблов хулосаси расмийлаштирилган.

 

Прокуратура баёнотида тинч аҳолига қарши ҳужумлар, инсонпарварлик ёрдамининг тўсиб қўйилиши ҳамда аҳолини оғир шароитларга қўйиш каби ҳаракатлар оддий хавфсизлик чораси сифатида баҳоланмаслиги, балки халқаро ҳуқуқ нуқтаи назаридан “геноцид” ва “инсониятга қарши жиноятлар” билан бевосита боғлиқлиги таъкидланган.

 

Шунингдек, Туркия фуқароларига нисбатан содир этилган ҳаракатлар мамлакат Конституцияси ва халқаро инсон ҳуқуқлари мажбуриятлари доирасида кўриб чиқилиши зарурлиги қайд этилган. Ҳужжатда давлатнинг бундай ҳолатларда самарали тергов ўтказиш ва суд механизмларини ишга тушириш мажбурияти борлигига эътибор қаратилган.

 

Айблов хулосасида Исроил ҳарбий-денгиз кучлари томонидан амалга оширилган амалиёт халқаро сувларда содир этилгани алоҳида қайд этилган. Шу асосда БМТнинг денгиз ҳуқуқи нормалари ҳамда Туркия жиноят қонунчилиги талаблари асосида иш бўйича тергов бошланган.

 

Айбланувчилар орасида Бинямин Нетаняҳудан ташқари, Исроил мудофаа вазири Исраэл Кац, собиқ мудофаа вазири Йоав Галлант, шунингдек бошқа юқори мартабали амалдорлар ҳам бор.

 

Прокуратура гумонланувчиларни “инсониятга қарши жиноятлар”, “геноцид”, “эркинликдан маҳрум қилиш”, “қийноқлар” ва бошқа қатор оғир жиноятларда айблаб, ҳар бирига нисбатан алоҳида оғирлаштирилган умрбод қамоқ жазоси ҳамда 1102 йил 9 ойдан 4596 йилгача озодликдан маҳрум этиш жазосини тайинлашни сўрамоқда.