Бухорода қорамол ўғриси ушланди
У қорамолни Gentra'га юклаб, олиб кетаётган бўлган.
Бухоро вилоятида Gentra автомобилида қорамол ўғирлашга уринган шахс қўлга олинди. Ҳолат Бухоро тумани ҳудудида ўтказилган профилактик тадбир давомида аниқланган, деб хабар берди ИИВ ахборот хизмати.
Маълум қилинишича, 20 май куни тунги соат 01:30 лар атрофида Бухоро—Қизилтепа автомобиль йўлида ҳаракатланаётган қора рангли Gentra ички ишлар ходимларида шубҳа уйғотган. Профилактика инспекторлари автомашинани тўхтатишга уринган, бироқ ҳайдовчи қонуний талабга бўйсунмай ҳаракатни давом эттирган.
Тезкор чоралар натижасида автомобиль тўхтатилиб, кўздан кечирилган. Аниқланишича, машинанинг орқа ўриндиқлари олиб ташланган бўлиб, салон қисмида йирик шохли қорамол олиб кетилаётган бўлган.
Суриштирув давомида қорамол Бухоро тумани “Кўчкўмар” маҳалласидаги фермер хўжаликларидан бирининг дала майдонидан яширин равишда ўғирлаб кетилаётгани маълум бўлган. Дастлабки ҳисоб-китобларга кўра, ҳўкизнинг қиймати қарийб 10 миллион сўмни ташкил этади.
Гумонланувчи Навоий вилояти Қизилтепа туманида яшовчи фуқаро экани, у аввал ҳам ўғрилик жинояти учун судлангани аниқланган.
Мазкур ҳолат юзасидан Жиноят кодексининг 169-моддаси 3-қисми “а” банди билан жиноят иши қўзғатилган. Ҳозирда тергов ҳаракатлари олиб борилмоқда.
