Ўзбекистонда китобхонлик танлови ғолибларига 50 минг долларгача мукофот берилади
Иштирокчилар учта ёш тоифасида қатнашади ва белгиланган тартиб асосида саралаб олинади.
Ўзбекистонда ҳар йили миллий китобхонлик ҳаракати ўтказилиб, ғолибларга йирик миқдорда пул мукофотлари топширилади. Бу Президентнинг “Ёшлар орасида китобхонлик дастурини кенг жорий этиш ва уларнинг қизиқишларини қўллаб-қувватлаш тўғрисида”ги фармойишида белгиланди.
Ҳужжатга кўра, 2026 йилдан бошлаб умумтаълим мактаблари ўқувчилари ўртасида китоб ўқишга қизиқишни оширишга қаратилган миллий китобхонлик ҳаракати йўлга қўйилади.
Дастур ҳар йили уч босқичда ташкил этилади. Биринчи босқич “kitobxonlikharakati.uz” электрон платформаси орқали онлайн тарзда ўтказилса, иккинчи ва учинчи босқичлар вилоят ҳамда республика даражасида анъанавий форматда ташкил қилинади.
Иштирокчилар учта ёш тоифасида қатнашади ва белгиланган тартиб асосида саралаб олинади.
Фармойишга мувофиқ, юқори синф тоифалари — 6–8-синф ҳамда 9–11-синф ўқувчилари орасида ғолиб ва совриндорлар пул мукофотлари билан тақдирланади:
- 1-ўринни олган 2 нафар ғолибнинг ҳар бири 50 минг АҚШ доллари пул мукофоти ва диплом;
- 2-ўринни олган 2 нафар совриндорнинг ҳар бири 30 минг АҚШ доллари пул мукофоти ва диплом;
- 3-ўринни олган 2 нафар совриндорнинг ҳар бири 15 минг АҚШ доллари пул мукофоти ва диплом;
- 5 та қўшимча номинациялар бўйича совриндорларнинг ҳар бири 10 минг АҚШ доллари пул мукофоти ва диплом.
