Эрон ва АҚШ келишувга эриша олмади
Америка делегацияси Исломободни тарк этди.
Эрон Ташқи ишлар вазирлиги вакили Исмоил Бағаийнинг маълум қилишича, Эрон ва АҚШ ўртасида Исломобод шаҳрида ўтказилган музокаралар якунида айрим масалалар бўйича келишувга эришилган бўлса-да, икки ёки учта муҳим йўналишда қарашлар кескин фарқ қилгани сабабли умумий келишувга эришилмаган.
Tasnim ахборот агентлиги келтирган маълумотларга кўра, томонлар музокаралар давомида бир қатор масалалар юзасидан ўзаро яқинлашувга эришган. Бироқ асосий масалалар бўйича позициялар мос келмагани музокараларнинг якуний натижасига таъсир кўрсатган.
Исмоил Бағаий музокаралар “ишончсизлик муҳити”да ўтганини таъкидлаб, бундай шароитда тезкор келишувга эришиш кутилмаганини қайд этган. Унинг сўзларига кўра, томонлар ўртасидаги тафовутлар чуқур бўлиб қолмоқда.
Ж.Д. Венс ҳам Эрон ва АҚШ делегациялари ўртасидаги музокаралар келишувсиз якунланганини маълум қилган. Унга кўра, Америка делегацияси музокаралардан сўнг ҳеч қандай битимга эришмасдан мамлакатга қайтган.
“Биз келишувга эриша олмадик. Бу ёмон хабар, Америкадан кўра Эрон учун кўпроқ. Шунинг учун биз келишувга эришмасдан АҚШга қайтамиз. Улар бизнинг шартларимизни қабул қилмади”, дея таъкидлаган у.
Tasnim агентлиги ҳам Исломободдаги музокаралар якунида томонлар ўртасида келишув имзоланмаганини тасдиқлаган.
