Икки кун ичида музокаралар бўйича муҳим ўзгариш бўлиши мумкин — Трамп
Вашингтон ва Теҳрон мулоқоти учун янги жойлар, жумладан Европа ҳам кўриб чиқилмоқда.
Доналд Трамп АҚШ ва Эрон ўртасидаги музокараларни Покистонда ўтказиш эҳтимолини истисно этмади.
АҚШ президенти бу ҳақда The New York Post нашрига берган интервьюсида маълум қилди. Унинг таъкидлашича, яқин икки кун ичида музокаралар бўйича “ижобий ўзгаришлар” юз бериши мумкин.
Трамп Покистонни музокаралар ўтказиш учун мақбул платформа сифатида баҳолаб, мамлакат ҳарбий раҳбари — Асим Мунир фаолиятини юқори баҳолади. Унга кўра, айнан шу омиллар АҚШ делегациясининг Покистонга қайтиш эҳтимолини оширмоқда.
Аввалроқ АҚШ президенти музокараларни бошқа ҳудудда ўтказиш вариантлари ҳам кўриб чиқилаётганини билдирган эди. Унинг сўзларига кўра, эҳтимолий жойлар қаторида Европа минтақаси ҳам бор, бироқ Туркия бу рўйхатга киритилмаган.
Шу билан бирга, Трамп Европа давлатларини Ҳормуз бўғози орқали юк ташишни тиклаш борасида етарли чоралар кўрмаётганликда танқид қилган.
Қайд этилишича, музокаралар бўйича якуний қарор ҳали қабул қилинмаган бўлиб, томонлар эҳтимолий сана ва жойни муҳокама қилишда давом этмоқда.
