Жавоҳир Синдаров Номзодлар турнирини рекордлар билан якунлади
Ўзбекистонлик шахматчи турнирни мағлубиятсиз ва 6 ғалаба билан тугатди.
Мусобақанинг сўнгги турида ўзбекистонлик шахматчи хитойлик Веи Йига қарши баҳс олиб борди. Учрашув 32-юришдан сўнг тезкор дуранг билан якунланди.
Натижада Синдаров турнирни мағлубиятсиз — 6 ғалаба ва 8 дуранг билан якунлаб, жами 14 имкониятдан 10 очко тўплади. Бу кўрсаткич икки даврали формат тарихидаги энг юқори натижа бўлиб, аввалги рекорд — 9,5 очко Иан Непомниачтчига тегишли эди.
Шунингдек, Синдаров турнир давомида 6 та ғалаба қайд этиб, яна бир рекорд ўрнатди. Бунгача ҳеч бир шахматчи Номзодлар турнирида бундай натижага эришмаган. Илгари максимал кўрсаткич 5 та ғалаба бўлиб, бу натижани Магнус Сарлсен, Фабиано Саруана ва бошқа етакчи гроссмейстерлар қайд этган.
Мазкур натижа орқали Жавоҳир Синдаров жаҳон чемпионлиги учун расмий даъвогарга айланди ва амалдаги жаҳон чемпиони — Доммаражу Гукешга қарши баҳс олиб бориш ҳуқуқини қўлга киритди. Ушбу учрашув йил охирида ўтказилиши режалаштирилган бўлиб, унда томонлар 14 партиядан иборат баҳсда тўқнаш келади.
Молиявий жиҳатдан ҳам Синдаров йирик мукофотга эга бўлди. Унга биринчи ўрин учун 70 минг евро кафолатланган. Бундан ташқари, ҳар ярим очко учун ажратилган бонуслар ҳисобига у 100 минг еврога яқин қўшимча даромад ишлаб топган.
