АҚШда 11 нафар олим сирли тарзда йўқолди

АҚШ Конгресси махфий маълумотларга кириш имконига эга бўлган олим ва мутахассисларнинг сирли ўлими ҳамда йўқолишлари юзасидан текширув бошлади. Бу ҳақда "Известия" хабар берди.

 

Конгрессменлар Жеймс Комер ва Эрик Берлинсон Энергетика вазирлиги, Пентагон, ФБР ва NASA'га расмий сўров юбориб, махфий илмий маълумотлар билан ишлаган ходимлар билан боғлиқ барча ҳолатлар бўйича маълумот тақдим этишни талаб қилди. Назорат қўмитаси аъзолари бундай воқеалар миллий хавфсизликка таҳдид солиши мумкинлигини таъкидламоқда.

 

Конгресс, шунингдек, давлат сирларига эга шахсларни ҳимоя қилиш чоралари бўйича брифинг ўтказишни талаб қилган. Конгрессмен Тим Бёрчеттнинг фикрича, амалдорлар ва олимлар билан боғлиқ ўлимлар тасодифий эмас ва айрим маълумотлар жамоатчиликни ларзага солиши мумкин.

 

Оқ уй маълум қилишича, президент Доналд Трамп ҳолатни шахсан назоратга олган. Маъмурият ФБР билан ҳамкорликда барча фактларни текширмоқда. Матбуот котиби Керолайн Ливиттга кўра, текширув доирасида “бирор жиҳат эътибордан четда қолдирилмайди”.

 

Fox News маълумотига кўра, 2022 йилдан буён ядровий физика ва космос соҳаларига оид камида 11 нафар мутахассиснинг ўлими ёки йўқолиши қайд этилган. 

 

Ушбу рўйхатдаги асосий шахслардан бири АҚШ Ҳарбий-ҳаво кучлари генерали Уилям Маккасленд бўлиб, у илмий-тадқиқот лабораториясига раҳбарлик қилган ва ўта махфий маълумотлар эгаси ҳисобланган. Унинг қаердалиги жорий йил февраль ойидан бери номаълум.

 

Улар орасида NASA ходими Моника Хасинто Реза, пудратчи Стивен Гарсия, астрофизик Карла Гриллмаер ва МИТ физиги Нуну Лоурейро бор. Шунингдек, NASA реактив ҳаракат лабораторияси ходими Френк Майвалднинг ўлими ҳақида ҳам хабар қилинган. 

 

Айниқса, 2022 йилда антигравитатсияни ўрганган 34 ёшли Эми Эскриджнинг ўлими терговчилар эътиборини тортган. Расман ўз жонига қасд қилиш деб баҳоланган ушбу ҳолат атрофида шубҳалар сақланиб қолмоқда.

 

ФБРнинг собиқ расмийларидан бири Кристофер Свекер бундай воқеалар ортида хорижий давлатлар операциялари бўлиши мумкинлигини истисно этмади.

 

Айни пайтда текширув ишлари давом этмоқда.