Бухорода уй-жой соҳасидаги 1,8 триллион сўмлик пул айланмаси яширилган
Шавкат Мирзиёев мамлакатда яширин иқтисодиётга қарши курашиш масалаларини танқидий муҳокама қилди.
Шавкат Мирзиёев раислигида 24 апрель куни ўтказилган видеоселектор йиғилишида мамлакатда яширин иқтисодиётга қарши курашиш масалалари танқидий муҳокама қилинди.
Қайд этилишича, ўтган йилда ушбу йўналишда алоҳида фармон қабул қилиниб, тизимли ишлар бошланган. Шунга қарамай, 2026 йил биринчи чораги якунлари айрим ҳудудларда муаммо сақланиб қолаётганини кўрсатди.
Хусусан, кузатилмайдиган иқтисодиёт улуши Жиззах вилояти, Қашқадарё вилояти, Наманган вилояти, Самарқанд вилояти, Сурхондарё вилояти ва Хоразм вилоятида 40 фоиздан юқори, Андижон вилояти, Фарғона вилояти ҳамда Бухоро вилоятида эса 30 фоиздан ортиқ экани қайд этилди.
Йиғилишда Бухоро вилоятидаги ҳолат алоҳида таҳлил қилиниб, ўтган йили фаолиятини тўхтатгани кўрсатилган 900 дан ортиқ корхона жорий йилнинг январь–февраль ойларида 1,3 миллион киловатт-соат электр энергияси ва 480 минг куб метр газ истеъмол қилгани аниқлангани маълум қилинди.
Шунингдек, 12,5 мингта транспорт воситасида юклар норасмий ташилгани оқибатида 40 миллиард сўм солиқ тушуми йўқотилгани қайд этилди. Биринчи чоракнинг ўзида уй-жой нархини паст кўрсатиш орқали 1 триллион 800 миллиард сўмлик пул айланмаси яширилгани билдирилди.
Йиғилиш якунида вилоят прокуратуралари, ички ишлар органлари ҳамда солиқ бошқармаларига яширин иқтисодиётга қарши курашиш бўйича аниқ методология ишлаб чиқиб берилгани, эндиликда ушбу тизим барча ҳудудларда туманлар кесимида жорий этилиши топширилгани маълум қилинди.
