Ўзбекистонда мигрантлар юборадиган пул миқдори 433 миллион долларга ошди
Shuningdek, hisobot davrida mamlakatdan xorijga 604 million dollar miqdorida valyuta mablag‘lari chiqarilgan.
2026 йил январь—март ойларида Ўзбекистонга хориждан пул ўтказмалари ҳажми ўтган йилнинг мос даврига нисбатан 13 фоизга ошди. Бу ҳақда Марказий банк шарҳида маълум қилинди.
Таҳлилларга кўра, меҳнат муҳожирлари йилнинг дастлабки уч ойида мамлакатга 3,8 миллиард доллар миқдорида маблағ юборган. Бу кўрсаткич 2025 йилнинг шу даврига нисбатан 433 миллион долларга кўпдир.
Марказий банк қайд этишича, биринчи чоракда халқаро пул ўтказмалари аҳолининг банкларга валюта сотувининг асосий манбаи бўлиб хизмат қилган.
Шу билан бирга, ҳисобот даврида Ўзбекистондан хорижга 604 миллион доллар миқдорида валюта маблағлари чиқарилган. Бу эса ўтган йилнинг биринчи чорагига нисбатан 39 миллион долларга камдир.
Маълумотларга кўра, Ўзбекистонга юборилаётган пул ўтказмаларининг қарийб 80 фоизи Россия ҳиссасига тўғри келади. Умуман олганда, 2025 йилда республикага чет элдан келиб тушган пул ўтказмалари ҳажми 18,9 миллиард долларга етган бўлиб, бу 2024 йилга нисбатан 28 фоизга ошган.
Ушбу ўсиш меҳнат муҳожирлари фаолият юритаётган давлатларда ишчи кучига талабнинг юқорилиги, иш ҳақларининг нисбатан барқарорлиги, иқтисодий фаолликнинг ошиши ҳамда миллий валюталар курсининг мустаҳкамланиши билан изоҳламоқда.
