Молдова парламенти фаолиятида рус тилидан воз кечади
Ҳукмрон партия томонидан тайёрланган ҳужжатга кўра, румин тили парламентнинг ягона ишчи тили этиб белгиланади.
Молдова парламенти қонунчилик органининг ташкил этилиши ва фаолияти тўғрисидаги кодекс лойиҳасини маъқуллади. Унга кўра, парламент фаолиятида рус тилидан фойдаланиш бекор қилинади. Бу ҳақда “Unimedia” нашри хабар берди.
Ҳужжатга мувофиқ, румин тили парламентнинг ягона ишчи тили этиб белгиланади. Норматив-ҳуқуқий ҳужжатлар румин тилида тайёрланиб, қабул қилинади ва зарурат туғилганда бошқа тилларга таржима қилинади.
Мазкур ташаббус ҳукмрон “Ҳаракат ва бирдамлик” (PDS) партияси депутатлари томонидан илгари сурилган бўлиб, Европа Комиссиясининг 2023–2025 йилларда Европа Иттифоқини кенгайтириш бўйича тавсияларини амалга оширишга қаратилгани таъкидланмоқда.
PDS депутати Игор Талмазан бу қарор парламентнинг иш жараёнида рус тилига мажбурий таржимани бекор қилиш ва барча расмий мулоқотни румин тилида олиб бориш зарурлигини кўзда тутишини билдирган.
Молдова 2022 йилда Европа Иттифоқига аъзо бўлиш учун ариза берганидан сўнг Евроинтеграция йўлини фаоллаштирган. 2024 йилда эса мамлакатда Европа Иттифоқига қўшилиш бўйича референдум ўтказилиб, унда кўпчилик фуқаролар қўллаб-қувватлаган.
Шунингдек, Молдова МДҲдан чиқиш жараёнини ҳам бошлагани қайд этилган. Расмий маълумотларга кўра, тегишли ҳужжатлар бекор қилингач, мамлакат ташкилотдан ҳуқуқий жиҳатдан чиқиши кутилмоқда.
