Энди Ўзбекистонда банклар фуқароларнинг йирик пул ўтказмаларини қатъий назорат қила бошлайди
Марказий банк йирик ва шубҳали транзакцияларни мониторинг қилиш бўйича янги тартибларни тасдиқлади.
Марказий банк томонидан молиявий операциялар устидан назоратни кучайтиришга қаратилган янги тартиблар тасдиқланди. Унга кўра, мамлакатдаги банклар айрим йирик ва шубҳали деб топилган транзакцияларни кучайтирилган мониторинг асосида кузатиб боради.
Қайд этилишича, янги ҳужжат орқали шубҳали операцияларни аниқлаш мезонлари ва индикаторлари янгиланган.
Янги тартибларга мувофиқ, кучайтирилган мониторинг остидаги давлатлардан амалга ошириладиган ва умумий суммаси 1000 БҲМ — 412 миллион сўмга тенг ёки ундан юқори бўлган пул ўтказмалари алоҳида назоратга олинади. Бу бир марталик транзакция ёки 30 кун давомида амалга оширилган бир нечта операцияларни ҳам ўз ичига олади.
Шунингдек, хизмат кўрсатиш ёки хизматлар билан боғлиқ қарзларни қоплаш бўйича импорт шартномаларига киритилган ўзгартиришлар ҳам мониторинг қилинади. Бунда шартнома суммаси 5000 БҲМ — 2 миллиард 60 миллион сўмдан ошган ҳолатлар алоҳида кузатувга олинади.
Бундан ташқари, 10,3 миллион сўмдан ортиқ пул ўтказмалари ҳамда 206 миллион сўмдан юқори нақд пул ечиб олиш операциялари юзасидан банклар махсус тизимга қўшимча маълумот киритиб боради.
Расмийларга кўра, мазкур чоралар ноқонуний даромадларни легаллаштириш, яширин молиявий айланишлар ва шубҳали пул оқимларига қарши курашиш мақсадида жорий этилмоқда.
