Хивада 12,3 гектарлик халқаро туристик шаҳарча барпо этилади

Хива шаҳрида тарихий мерос ва замонавий шаҳарсозлик ечимларини уйғунлаштирган халқаро туристик шаҳарча барпо этилиши режалаштирилмоқда. Президент Шавкат Мирзиёев шаҳарча лойиҳаси тақдимоти билан танишди.

 

Умумий майдони 12,3 гектар бўлган мажмуада меҳмонхоналар, музей, ресторанлар, савдо ва хизмат кўрсатиш объектлари жойлаштирилади. Музейда тарихий ва замонавий экспонатлар намойиш этилиши кўзда тутилган.

 

Туристик шаҳарчанинг меъморий концепцияси Хоразмнинг  асрлик шаҳарсозлик анъаналари асосида ишлаб чиқилган. Жумладан, 1511 йилда Хива хонлигининг илк пойтахти бўлган қадимий Вазир шаҳрининг тарихий тузилиши ва кўчалар тармоғи концепцияга асос қилиб олинган.

 

Мажмуанинг салмоқли қисми яшил ҳудудлар ва сайр йўлакларига ажратилади. Бу ерда шаршарали фавворалар ва ички ариқлар барпо этилади. Автотураргоҳларда эса қуёш панеллари ўрнатилган соябонлар ташкил этилиши режалаштирилган.

 

Маълумотларга кўра, сўнгги тўққиз йилда Хоразмда 280 та меҳмонхона ва меҳмон уйи қурилган, меҳмонхона фонди тўрт баробар ошган. Сўнгги беш йилда вилоятга ташриф буюрган хорижий сайёҳлар сони эса 10 бараварга кўпайган.

 

Янги туристик шаҳарча Ичан-қалъага тушаётган туристик юкламани камайтириш, сайёҳлар учун янги йўналиш ва хизматларни таклиф этиш ҳамда уларнинг Хоразмда қолиш муддатини узайтиришга хизмат қилади.

 

Лойиҳа доирасида минглаб янги иш ўринлари яратиш ва аҳоли учун автомобиллар ҳаракатидан холи яшил дам олиш ҳудудларини ташкил этиш кўзда тутилган.