Хоразм вилоятида 176 миллион долларлик 12 та лойиҳа ишга туширилди

Хоразм вилоятида умумий қиймати 176 миллион доллар бўлган 12 та лойиҳа ишга туширилди. Шунингдек, хорижий ҳамкорлар иштирокида қиймати 7 миллиард 424 миллион долларлик 15 та янги лойиҳа қурилишига старт берилди.

 

 

Янги лойиҳаларни ишга тушириш маросими 17 август куни Хива шаҳридаги “Фаровон Khiva Hotel” меҳмонхонасида Президент Шавкат Мирзиёев иштирокида бўлиб ўтди.

 

Тадбирда қайд этилишича, сўнгги тўққиз йил давомида Хоразм вилоятига 7,5 миллиард доллар инвестиция киритилиб, 9,7 мингта янги қувват ишга туширилган. Кичик ва ўрта бизнес лойиҳаларини молиялаштириш учун 33 триллион сўмдан зиёд кредит ажратилган.

 

 

Натижада вилоятда аҳолининг реал даромадлари икки баравар ошган. Камбағаллик даражаси 4,4 фоизга, ишсизлик эса 4,5 фоизга тушган. 72 та маҳалла “ишсизлик ва камбағалликдан ҳоли” ҳудудга айланган. Вилоятда транспорт ва туризм инфратузилмасини ривожлантириш бўйича ҳам ишлар олиб борилмоқда.

 

Сўнгги тўққиз йилда 280 та меҳмонхона ва меҳмон уйи қурилган, меҳмонхона фонди тўрт баравар ошган. Охирги беш йилда Хоразмга ташриф буюрган хорижий сайёҳлар сони эса 10 бараварга кўпайган.

 

 

Тадбирда 2026 йилда вилоятга жалб этилаётган хорижий инвестициялар ҳажми 2 миллиард доллардан ошаётгани таъкидланди. Йил бошидан буён Урганч ва Хива шаҳарлари, Тупроққалъа ҳамда Урганч туманларида кимё, машинасозлик, қурилиш материаллари ва туризм йўналишларидаги лойиҳалар учун зарур инфратузилма яратилган.

 

Шунингдек, Урганч халқаро аэропортидан Хивагача электрлаштирилган темир йўл линияси фойдаланишга топширилди. Урганч–Хива пулли автомобиль йўли ҳам ишга туширилмоқда. Мазкур йўл орқали Урганчдан Хивага етиб бориш вақти 45 дақиқадан 20 дақиқагача қисқариши кутилмоқда.

 

 

Янги лойиҳалар орасида Тупроққалъа туманида БАА ҳамкорлигида 6 миллиард долларлик экологик авиация ёқилғиси ишлаб чиқариш лойиҳаси, 170 миллион долларлик биоэтанол корхонаси, Урганч шаҳрида 30 миллион долларлик меҳмонхона ва савдо-кўнгилочар мажмуаси ҳамда Урганч туманида 100 миллион долларлик чиқиндиларни қайта ишлаш ва 71 мегаватт “яшил” энергия ишлаб чиқариш лойиҳаси бор.

 

Бундан ташқари, Хива яқинида 120 миллион долларлик “Саҳро юлдузи” туристик мажмуаси, Урганч туманида 26 миллион долларлик мис саноати кластери ва 60 миллион долларлик оптик толали кабеллар ишлаб чиқариш корхонаси ташкил этилади.

 

 

Ал-Хоразмий шаҳарчасида 5 минг талабага мўлжалланган университет, меҳмонхона, дам олиш ва савдо мажмуалари, Урганч шаҳрида эса “Инвесторлар уйи” қурилиши режалаштирилган. Лойиҳалар натижасида жами 6,6 мингта янги иш ўрни яратилиши кутилмоқда.

Президент Шавкат Мирзиёев рамзий тугмани босиб, янги лойиҳаларни ишга туширди ва истиқболдаги лойиҳалар қурилишига старт берди.