Қирғизистон ва Ўзбекистон ҳудудларни алмашиш бўйича кейинги қадамларни келишиб олди
Ҳудудларни алмашиш бўйича келишувларни амалга ошириш учун қўшма ишчи гуруҳ тузди. Гуруҳ аҳоли фуқаролиги, кўчириш, мулкий ҳуқуқлар, ердан фойдаланиш ва ижтимоий ҳимоя масалаларини ҳал қилади.
Қирғизистон ва Ўзбекистон ер майдонларини алмашиш бўйича аввал эришилган келишувларни амалга ошириш юзасидан кейинги амалий қадамларни белгилаб олди. Бу ҳақда 24.kg хабар берди.
Бу масала Қирғизистоннинг Боткен вилояти Қадамжой туманида бўлиб ўтган икки давлатнинг қўшма ишчи комиссияси йиғилишида муҳокама қилинди.
Йиғилишда алмашинадиган ҳудудлар аҳолиси фуқаролиги, уларни кўчириш, давлат мулки объектларини қабул қилиш ва топшириш, фуқароларнинг мулкий ҳуқуқларини расмийлаштириш, ердан фойдаланиш ҳамда ижтимоий ҳимоя масалалари кўриб чиқилди.
Шунингдек, мазкур ҳудудлар аҳолиси учун таълим жараёнининг узлуксизлигини таъминлаш масаласига ҳам эътибор қаратилди.
Йиғилиш якунида икки мамлакатнинг тегишли вазирлик ва идоралари ҳамда маҳаллий ҳокимият органлари вакилларидан иборат қўшма ишчи гуруҳ таркиби тасдиқланди.
Ишчи гуруҳ ҳудудларни алмашиш билан боғлиқ масалаларни амалий жиҳатдан ҳал этиш билан шуғулланади. Унинг вакиллари айирбошланадиган ҳудудларга ташриф буюриб, амалга оширилган ишлар ва натижалар ҳақида комиссия ҳамраисларига мунтазам ахборот тақдим этади.
Қирғизистон томонидан комиссияга вазирнинг биринчи ўринбосари Камчибек Досматов, Ўзбекистон томонидан эса ички ишлар вазирининг биринчи ўринбосари Б. Б. Қудратхўжаев раҳбарлик қилмоқда.
