Россияда ўзбекистонлик ва бангладешлик мигрантлар иштирокида оммавий муштлашув юз берди
Можарода 60 га яқин ишчи қатнашган, 20 киши шифохонага ётқизилган.
Россиянинг Ленинград вилоятида жойлашган Синявинская паррандачилик фермасида Ўзбекистон ва Бангладеш фуқаролари ўртасида оммавий можаро юз берди. Бу ҳақда Gazeta.ru нашри хабар берди.
Маҳаллий ҳуқуқни муҳофаза қилувчи органлар маълумотига кўра, ҳодиса Киров тумани ҳудудидаги Приладожский қишлоғида жойлашган корхонада содир бўлган. Дастлаб ишчилар ўртасида оғзаки тортишув келиб чиққан, кейинчалик эса можаро оммавий муштлашувга айланган.
Маълумотларга кўра, жанжалда қарийб 60 нафар мигрант иштирок этган. Ҳодиса жойига полиция, Росгвардия ва тез тиббий ёрдам бригадалари жалб қилинган.
Муштлашув оқибатида 20 киши турли даражадаги тан жароҳатлари билан шифохонага ётқизилган. Улардан етти нафари оғир аҳволда экани айтилмоқда.
Россия Ички ишлар вазирлиги ҳодиса юзасидан текширув ишлари олиб бораётганини маълум қилди. Ҳозирда 21 ёшдан 39 ёшгача бўлган 12 нафар хорижлик билан тергов ҳаракатлари олиб борилмоқда. Дастлабки маълумотларга кўра, айнан улар жанжалнинг энг фаол иштирокчилари бўлган.
Дастлабки маълумотларга кўра, можаро Бангладеш фуқароси Марказий Осиёдан бўлган ҳамкасбини ўпганидан кейин бошланган. Бу ҳолатни ўзбекистонлик ишчининг отаси кўриб қолган ва шундан сўнг зиддият кучайган.Иш сменасидан кейин елишмовчилик паррандачилик фабрикаси ҳудудидаги ётоқхонада давом этган.
Шунингдек, ҳодиса давомида таёқ, тош ва бошқа қўлбола буюмлардан фойдаланилгани қайд этилган.
Айни пайтда ҳодисанинг барча тафсилотлари ўрганилмоқда. Ҳозирча жиноий иш қўзғатилгани ҳақида расмий маълумот берилмаган.
