Тошкентда банк ходимлари мижознинг 500 минг доллар омонат пулини талон-торож қилди
Улар омонат пулини сохта ҳужжатлар асосида қўлга киритган. Ҳолат юзасидан тергов ҳаракатлари олиб борилмоқда.
Тошкент шаҳрининг Учтепа туманида тижорат банки ходимлари томонидан йирик миқдордаги маблағни ўзлаштириш ҳолати аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти маълум қилди.
Қайд этилишича, департаментнинг Учтепа тумани бўлими томонидан ўтказилган терговга қадар текширув давомида тижорат банкининг масъул шахслари фуқаро И.М.нинг банк омонатига қўйилган 500 минг АҚШ долларини сохта ҳужжатлар асосида қўлга киритиб, ўзлаштириш йўли билан талон-торож қилгани аниқланган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ҳамда 228-моддаси (ҳужжатлар, штамплар, муҳрлар, бланкаларни тайёрлаш, қалбакилаштириш, сотиш ёки улардан фойдаланиш) билан жиноят иши қўзғатилган.
Ҳозирда ҳолат юзасидан тергов ҳаракатлари олиб борилмоқда.
