Бухорода зарарли APK файллар тарқатган гуруҳ ушланди: 60 дан ортиқ фуқаро жабр кўрган
Гумонланувчилар Telegram орқали зарарли APK файлларни юбориб, қурилмалардаги банк маълумотлари ва SMS-кодларни қўлга киритган.
Бухорода Telegram орқали зарарли APK файллар тарқатиб, фуқароларнинг банкдаги маблағларини ўзлаштирганликда гумонланган шахслар ушланди. Бу ҳақда ИИВ Кибержиноятларга қарши курашиш департаменти хабар берди.
Дастлабки терговга кўра, жиноят схемасини Самарқанд вилоятида яшовчи 20 ёшга тўлмаган йигит ва унинг турли ҳудудлардаги шериклари ташкил қилган.
Гуруҳ аъзолари Телеграмъдаги яширин бошқариладиган аккаунтлар орқали фуқароларнинг телефонларига зарарли APK файлларни юборган. Дастур қурилмага ўрнатилгач, фойдаланувчиларнинг банк маълумотлари ҳамда пул ўтказмаларини тасдиқлаш учун келадиган SMS-кодлар жиноятчилар назоратига ўтган.
Шундан сўнг ўғирланган маблағлар бегона шахслар номига очилган транзит банк карталари ва сохта аккаунтларга ўтказиб юборилган.
Гумонланувчилар қўлга олинганида ўнлаб банк карталари, SIM-карталар ва махсус мобил қурилмалар ашёвий далил сифатида расмийлаштирилган.
Қайд этилишича, мазкур схемадан республика бўйлаб 60 нафардан ортиқ фуқаро зарар кўрган.
Ҳолат юзасидан Жиноят кодексининг 169-моддаси учинчи қисми «б» банди билан жиноят иши қўзғатилган. Ҳозирда гуруҳга алоқадор бошқа шахсларни аниқлаш, уларни жавобгарликка тортиш ҳамда жабрланганларнинг ҳуқуқларини тиклаш бўйича тергов ҳаракатлари олиб борилмоқда.
