Ноқонуний криптовалюта айланмаси: 683 минг долларлик операциялар аниқланди
Фуқаронинг лицензия олмасдан крипто-активларни ўтказиш билан шуғуллангани аниқланган.
Тошкентда 41 ёшли фуқаро лицензиясиз равишда крипто-активларни ноқонуний ўтказиш ва айирбошлаш билан шуғуллангани аниқланиб, унга нисбатан жиноят иши қўзғатилди. Бу ҳақда ИИВ Кибержиноятларга қарши курашиш департаменти хабар берди.
Маълум бўлишича, 1985 йилда Қашқадарё вилоятида туғилган, Тошкент шаҳрида яшовчи фуқаро 2021–2025 йиллар давомида қонунчиликда белгиланган тартибда лицензия олмаган ҳолда мобил телефони орқали Binance халқаро крипто-биржасида махсус аккаунт очган.
У ушбу аккаунт орқали қарийб 700 та криптоактив олди-сотди операциясини амалга оширган. Операцияларнинг дастлабки қиймати 683 минг АҚШ доллари, яъни 9 миллиард сўмдан ортиқни ташкил қилган.
Фуқаро мазкур криптоактивларни қонунга хилоф равишда ўтказиш ва айирбошлаш билан шуғуллангани аниқланган.
Ҳолат юзасидан Қашқадарё вилояти ИИБ Кибержиноятларга қарши курашиш бошқармаси тергов бўлими томонидан Жиноят кодексининг 278-8-моддаси 3-қисми “а” банди билан жиноят иши қўзғатилган.
Ҳозирда дастлабки тергов ҳаракатлари олиб борилмоқда.
