“Фоизсиз кредит” тузоғи: 400 дан ортиқ киши алданди
Тошкент вилоятида фуқароларга фоизсиз кредит олиб беришни ваъда қилиб, уларнинг пулини ўзлаштирган жиноий гуруҳ фаолиятига чек қўйилди.
Тошкент вилояти ИИББ Ахборот технологиялари соҳасидаги жиноятларга қарши курашиш бошқармаси тезкор ходимлари томонидан ўтказилган тадбирлар давомида жиноий гуруҳ фош этилди.
Аниқланишича, гуруҳ аъзолари интернет тармоқларида “фоизсиз кредит олиб берамиз” мазмунидаги эълонларни жойлаштириб, таклифга қизиққан фуқароларни олдиндан ижарага олинган ҳашаматли офисларга чақирган.
Улар фуқароларга ўз номларига кредит расмийлаштириб беришни таклиф қилган. Масалан, 100 миллион сўмлик кредитнинг 50 миллион сўми фуқарога берилиши, қолган 50 миллион сўми эса компанияда қолиши, кредитнинг ойлик тўловларини эса гуруҳ аъзолари ўзлари тўлаб боришини ваъда қилган.
Бу ваъдаларга ишонган фуқаролар ўз телефонлари орқали кредит расмийлаштирган. Натижада 400 нафардан ортиқ фуқаронинг номига кредитлар олинган ва ажратилган маблағларнинг тенг ярми фирибгарлар томонидан ўзлаштирилган. Ўзлаштирилган маблағларнинг умумий миқдори қарийб 17 миллиард сўмни ташкил этган. Орадан вақт ўтиб, фуқароларга банклар томонидан кредит қарздорлигини ундириш бўйича талабномалар юборила бошланган.
Мазкур ҳолат юзасидан Жиноят кодексининг 168-моддаси (Фирибгарлик) билан жиноят иши қўзғатилган.
Терговга қадар текширув ва тезкор тадбирлар давомида гуруҳнинг олти нафар аъзоси гумонланувчи тариқасида ушланиб, қамоққа олинган. Ҳозирда жиноят иши юзасидан тергов ҳаракатлари давом этмоқда.
ИИББ фуқароларни интернетдаги “фоизсиз кредит”, “жуда кам фоизли кредит” ёки “ҳужжатсиз кредит” каби шубҳали таклифларга ишонмасликка чақирди.
Шунингдек, кредит бошқа шахс томонидан тўлаб борилиши ҳақидаги ваъдаларга алданмаслик кераклиги таъкидланди. Чунки кредит фуқаронинг номига расмийлаштирилган бўлса, банк олдидаги мажбурият ҳам унинг зиммасида қолади.
