Ноқонуний “Умра” хизмати: икки ҳолат юзасидан жиноят иши қўзғатилди
Самарқанд ва Сирдарёдаги ҳолатларда фуқаролардан “Умра” зиёратини ташкил этиш эвазига жами 4300 АҚШ доллари талаб қилинган.
Самарқанд ва Сирдарё вилоятларида фуқароларни ноқонуний равишда “Умра” зиёратига юборишни ваъда қилиб, пул талаб қилган шахслар ушланди.
Самарқанд вилоятининг Паяриқ туманида фаолият юритувчи авиакасса раҳбари тегишли ваколатга эга бўлмаганига қарамай, маҳаллий фуқарони Саудия Арабистонига “Умра” зиёратига юборишни ваъда қилган. Бунинг эвазига ундан 1150 АҚШ доллари талаб қилинган.
Давлат хавфсизлик хизмати ва ички ишлар органлари ходимлари ҳамкорлигида ўтказилган тезкор тадбир давомида авиакасса раҳбари сўралган пулни олаётган вақтида ашёвий далиллар билан ушланди.
Сирдарё вилоятидаги ҳолатда эса Гулистон туманида яшовчи, 1988-йилда туғилган шахс уч нафар фуқарони Тошкент шаҳридаги туристик фирма орқали Саудия Арабистонига “Умра” зиёратига юборишни ваъда қилган. У бунинг эвазига жами 3150 АҚШ доллари талаб қилган.
Мазкур шахс сўралган маблағ ҳисобидан 3,5 миллион сўмни олдиндан олаётган вақтида Давлат хавфсизлик хизмати, Иқтисодий жиноятларга қарши курашиш департаменти ҳамда ички ишлар органлари ходимлари томонидан ушланди.
Қайд этилишича, ҳар икки ҳолат юзасидан жиноят ишлари қўзғатилган. Ҳозирда тергов ҳаракатлари олиб борилмоқда.
Мутасаддилар фуқароларни “Умра” зиёратини ташкил этиш бўйича хизматлардан фойдаланишда тегишли ваколат ва ҳужжатларга эга ташкилотларни танлашга чақирмоқда.
