Ҳусановнинг иккинчи соврини: “Манчестер Сити” Англия Кубоги ғолиби бўлди

Лондондаги «Uembli» стадионида Англия Кубоги финал учрашуви бўлиб ўтди. Унда “Манчестер Сити” ва «Челси» жамоалари ўзаро куч синашди.

Қизиқарли кечган финал баҳсида “Манчестер Сити” 1:0 ҳисобида ғалаба қозониб, 2025/26 йилги мавсум Англия Кубоги соҳибига айланди. Учрашув тақдирини иккинчи бўлимда киритилган ягона гол ҳал қилди.

Гол 72-дақиқада Эрлинг Ҳоланднинг аниқ узатмасидан сўнг Антуан Семенё томонидан киритилди. «Челси» жамоаси ўйиннинг сўнгги дақиқаларигача ҳисобни тенглаштиришга ҳаракат қилган бўлсада, натижани ўзгартира олмади.

Ўзбекистон терма жамоаси ҳимоячиси Абдуқодир Ҳусанов учрашувни асосий таркибда бошлади ва тўлиқ 90 дақиқа майдонда ҳаракат қилди. Футболчи 56-дақиқада рақиб футболчиси Марк Кукуреляга нисбатан қўпол ҳаракати учун сариқ карточка билан жазоланди.

Мазкур соврин Ҳусанов учун “Манчестер Сити” таркибидаги иккинчи йирик соврин бўлиб, у аввал Англия Лига Кубогида ҳам ғолибликни қўлга киритган эди.