Ўзбекистонда аёллар эркаклардан кўпми?

Ўзбекистонда 2026 йил 1 январь ҳолатига кўра, ҳар 1000 нафар аёлга ўртача 1015 нафар эркак тўғри келган. Бу ҳақда Миллий статистика қўмитаси маълум қилди.

 

Қўмита маълумотига кўра, ҳудудлар кесимида энг юқори кўрсаткич Наманган вилоятида қайд этилган бўлиб, у ерда ҳар 1000 нафар аёлга 1034 нафар эркак тўғри келади. 

 

Кейинги ўринларда Қашқадарё вилояти — 1029 нафар, Андижон вилояти — 1027 нафар ва Навоий вилояти — 1026 нафар билан қайд этилган.

 

Шунингдек, Сурхондарё вилоятида бу кўрсаткич 1025 нафарни ташкил этган. Жиззах ва Фарғона вилоятларида — 1019 нафардан, Самарқанд вилоятида — 1016 нафар эркак ҳар 1000 нафар аёл ҳисобига тўғри келган.

 

Қорақалпоғистон Республикасида мазкур кўрсаткич 1010 нафарни ташкил этган бўлса, Сирдарё вилоятида — 1009 нафар, Тошкент вилоятида — 1008 нафар, Бухоро вилоятида — 1006 нафар ва Хоразм вилоятида — 1004 нафар этиб қайд қилинган.

 

Тошкент шаҳри эса рўйхатда энг паст кўрсаткичга эга ҳудуд бўлган. Пойтахтда ҳар 1000 нафар аёлга 966 нафар эркак тўғри келган.