Фарғонада фермердан 192,6 млн жарима ундирилди

Мажбурий ижро бюроси Бешариқ туман бўлими томонидан қарздор Ф.О.О.дан 192 миллион 610 минг сўм жарима тўлиқ ундирилди.

Мазкур ижро ҳужжати Жиноят ишлари бўйича Фурқат туман судининг 2026 йил 7 апрелдаги ҳукми ҳамда Фарғона вилоят суди апелляция инстанциясининг ажрими асосида қўзғатилган.

Аниқланишича, фермер хўжалиги раҳбари минерал ўғит етказиб беришни ваъда қилиб, фуқародан 20 минг АҚШ доллари олган. Шунингдек, фермер хўжалигини сотиш билан боғлиқ ҳолатда ҳам бошқа шахснинг пул маблағларини ноқонуний равишда қўлга киритган.

Қарздор жаримани ихтиёрий тўлаш учун берилган муддатда мажбуриятини бажармагани сабабли, давлат ижрочилари томонидан унга тегишли нотурар бино ва иншоотлар хатланди.

Кўрилган чоралар натижасида 192 610 000 сўм жарима тўлиқ ундирилиб, ижро иши амалда тамомланди.