Британия қироли Чарлз III “вафот этди” — Radio Caroline
Радиостанция эфирида техник хато сабаб қиролнинг вафоти ҳақида нотўғри хабар тарқатилди ва кейинчалик тингловчилар ҳамда қироллик оиласидан узр сўралди.
Британиянинг Radio Caroline радиостанцияси эфир вақтида техник хатолик туфайли қирол Чарлз III вафоти ҳақида нотўғри хабар эълон қилди. Кейинчалик станция мазкур ҳолат юзасидан тингловчилар ҳамда қироллик оиласидан расман узр сўради.
Маълум қилинишича, ҳодиса 19 май куни кундузги эфир жараёнида юз берган. Тингловчилар эфирда монархнинг вафоти ҳақида шошилинч эълон берилганини билдирган, шундан сўнг эшиттириш вақтинча тўхтатилган.
Кейинчалик бошловчилар эфирни давом эттириб, юзага келган ҳолат техник носозлик билан боғлиқ эканини маълум қилган ва тингловчилардан узр сўраган. Радиостанция директори Питер Мур ҳам ҳолат “монарх вафоти бўйича огоҳлантириш тизими тасодифан фаоллашгани” натижасида юз берганини билдирган.
Шунингдек, Radio Caroline қироллик оиласи билан узоқ йиллик ҳамкорлик анъанасини давом эттиришини ва келгусида бундай ҳолатлар такрорланмаслигини таъкидлаган.
Ҳодисадан бир кун олдин, Чарлз III Қироллик боғдорчилик жамияти (RHS) томонидан ҳар йили ташкил этиладиган Челсеа гуллар кўргазмасида иштирок этган.
