Тошкентда 9-синф ўқувчини калтаклаган ўқитувчига жиноят иши қўзғатилди
Жанжал вақтида ўқитувчи томонидан ўқувчига тан жароҳати етказилган.
Аввалроқ, Тошкент шаҳри Мирзо Улуғбек туманидаги 275-сонли умумтаълим мактабида информатика фани ўқитувчиси 9-синф ўқувчини калтаклагани хабар қилинган эди.
Ушбу ҳолат юзасидан жиноят иши қўзғатилди. Бу ҳақда пойтахт Ички ишлар бош бошқармаси хабар берди.
Маълум қилинишича, 19 май куни вояга етмаган, 2010 йилда туғилган Р.Р. ҳамда 2002 йилда туғилган ўқитувчи З.О. дарс жараёнида ўзаро тортишиб, кейинчалик жанжаллашиб кетган.
Аниқланишича, ўқувчи дарс пайтида ўқитувчи томонидан берилган топшириқни бажармаган ҳамда машғулот жараёнига халақит берган. Жанжал вақтида ўқитувчи томонидан ўқувчига тан жароҳати етказилган. Жабрланувчи тиббий ёрдам учун шифохонага мурожаат қилган.
Мазкур ҳолат юзасидан ўқитувчига нисбатан Жиноят кодексининг 105-моддаси (қасддан баданга ўртача оғир шикаст етказиш) билан жиноят иши қўзғатилган бўлиб, тергов ҳаракатлари олиб борилмоқда.
Эслатиб ўтамиз, аввалроқ Самарқандда мактаб директори ўринбосари 9-синф ўқувчисини калтаклагани хабар берилган эди.
